Nytzligi Typps - Guggemuusig Barbarossa 1963

Direkt zum Seiteninhalt

Hauptmenü:

Nytzligi Typps

Faasnacht 2018

Nytzligi Typps, guet voorberaitet isch die halbi Fasnacht

Voor de drey scheenschde Daag, setsch  di Instrumänt wiider emool uff Voordermaa bringe,
Drumbeete, Posuune, Hernli und Bäss rainige: Reinigungsmittel mit Wasser in Drichter leere und
e wyyli stoo loo. Mit em Duschischluuch duurespiele. Alli Zyyg uusezie, reinige & licht mit Vaseline
yyfette. D Ventil, reinige und eele, dass si  nid aahogge.(Es git eel wo nid schmeggt. z.B FAST)
Die wo zueloose, wenn de spiilsch wärde dir Danggbaar si, wells nid esoo gruusig  uus
dim Inschtrumät stinggt. Mach di Mundstygg an e Kordle und hänggs um e Hals, dass
des nid verliersch. Bi de Drummle, Paugge und Schlaagzyyg: setsch luege ebs kaini
Riss und Bruchstelle het, alli Schruube aazooge sinn & eb d Fäll und d Saite no guet sinn.
Am Allerbeschde, duesch di Kessel ney Schrängge. Isch d Beschriftig no OK ? Hesch Ersatzschleegel ?

Legg oder hängg di Instumänt und Larve yberaal esoo
aane,  dass niemerts draastoost oder druffdrampe kaa.
De muesch au immer e Aug druff haa, as es dir  nid gschdoole wird.

Am beschde goosch no zem Heerlifilzer und losch dr e kurzi Fryyse mache,
denn  isch s dr weeler unter dr Larve und wenn de si abziesch gseesch erst
no besser uus, well de nid esoo arg vertschubblet bisch.

Zieh di neyi Larve de Haim emool ebbe e halb Stund aa, denn mergsch wo si druggt und de kasch mit
eme bitzeli Schuumstoff (z.B. vo dr Gschirräämliunterlaag) und Doppelkläbband d Larve uusbolschdere.

Lueg as de Bequäämi und warmi Schue aa hesch, Zocceli sinn unbequääm
und kasch erscht no nid so rächt dermit marschier, Doorum sinn si bi de Binggis verbote.

Die wo schnäll kalti Finger hänn sette d Hänsche nid vergässe.

Leg unterem Goschdym abgschnitteni Jeans aa, denn hesch gniegend Segg zem alli Sache z versorge.
Nimm uff jeedefall e Plastik- Räägeschutz mit, me wais jo nie. Ybrigens kasch en im Larvehelm verstaue.

Wenn de e Brylle bruchsch, probiers voorhäär uus ebb si nid aalauft unter dr Larve,
sunscht muesch si behandle.              

Es isch Wichtig, dass de in dääre Zyt wo de nid Aggtiv Gugge machsch, gniegend schloofsch.
Nur uusgschloofe und fit macht d Fasnacht allne richtig Freyd.

Nimm nie z viil Gäld mit, de kenntsch es verliere, oder es ka dr gschdoole wärde.
Am beschde nimsch e soone glains Portmenee wo de kasch um e Hals hängge.

S Händy losch am beschde de Haim. Wenn de aber as freye Mensch, unerwartet doch total abhängig vo
dämm Gräätli bisch, denn schalt s aifach ab und lueg numme in de Pause ebb di ebber gsuecht het.

Wenn di as Binggis ebbis bloggt, sags dr Claudia, ere Beglaitpersoon, oder em Jügge.

Hesch Blootere an de Lippe, nimm aifach Hymapaste, wenn s im Muul inne offe isch kasch Mundisaan nää
du kasch das in dr Apotheek kaufe.
  
Alli drugge e n Aug zue, wenn s emool nid esoo lauft wie m es gärn hät.
Probleem kenne mer noch dr Fasnacht in Rueh uusdikutiere.

Ich wynsch Eych e scheeni und probleemloosi Fasnacht 2018    



 
Zurück zum Seiteninhalt | Zurück zum Hauptmenü